Concursu Yes Youtuber!

#yesyoutuber #playpresta

Bases del concursu

  1. Oxetivos: El concursu ¡Yes youtuber! de youtubers n’asturianu, convocáu pola plataforma PlayPresta y Cuatro Gotes Producciones, tien como oxetivu afalar y visibilizar l’usu del asturianu en toa triba de videos en formatu de programes per internet. La canal quier descubrir y dar a conocer talentos nuevos qu’apaecen ente la mocedá y tamién ente la xente d’otres edaes.
  2. Formatos: El concursu ta abiertu a toles propuestes posibles, dende opinión a entretenimientu, pasando per videotutoriales, telerealidá, ficción y otres propuestes nueves o formatos recuperaos y adaptaos al mediu dixital. Queden espresamente escluyíos los videos que promuevan un mensaxe violentu, denigrante o ofensivu.
  3. Condiciones: Habrá presentase un videu de menos de 5 minutos que podrá mandase n’archivu o colgase en plataformes como YouTube de forma pública o privada, unviando enllaz ya incluendo siempres les etiquetes #yesyoutuber #playpresta xunto al títulu del videu
  4. Menores: Nel casu de los menores que participen ha acompañase una autorización de los o les tutores llegales pa la participación y pa la difusión del videu (descargando l’archivu na páxina web de PlayPresta), asina como datos del profesor o profesora y centru educativu al que pertenez l’alumnáu participante.
  5. Actividaes: Amás, alredor d’esti concursu, la plataforma PlayPresta va organizar actividaes de difusión y visibilización de los proyecos presentaos n’institutos y eventos culturales (Metropoli Xixón, Cometcom Uviéu, etc.) onde los ganadores van participar.
  6. Xuráu: El xuráu va tar formáu pol equipu técnicu de PlayPresta, asina como por presentadores de la canal y otres persones venceyaes al audiovisual asturianu y a la normalización llingüística.
  7. Criterios: El xuráu va valorar la calidá de los conteníos, l’inxeniu y la orixinalidá, ensin tener en cuenta la calidá técnica de forma preminente, pero sí la calidá llingüística del asturianu utilizáu (a nivel fonéticu, léxicu, sintácticu, etc.), asina como l’interés normalizador y la potencialidá pa llegar a la mocedá de la propuesta. Van valorase tamién les dotes interpretatives o comunicatives y l’aprovechamientu de los recursos propios del llinguaxe audiovisual y la so capacidá d’incidencia nel públicu.
  8. Ganadores: Va declarase un videu ganador en cada categoría, asina como dellos finalistes, d’alcuerdu col criteriu del xuráu, pudiendo declarase erma una o delles categoríes.
  9. Plazu: El plazu pa inscribir los videos nel concursu ¡Yes youtuber! ye del 1 d’avientu de 2018 a 15 d’abril del 2019 a les 23.59  h. La participación ta abierta al ámbitu internacional y ye de baldre.
  10. Inscripción: Les persones participantes tienen d’inscribise al traviés del formulariu que figura na web www.playpresta.com/yesyoutuber Cada autor o autora, individual o colectivu, pue inscribir tantos videos como quiera. Nel momentu de la inscripción l’autor o autora tien d’escoyer la categoría na que quier inscribise.
  11. Categoríes: El concursu tendrá les siguientes estayes:
  • Primaria
  • Secundaria y bachilleratu
  • Mocedá (18 a 35 años)
  • Adultos (36 años p’alantre)

12. Premios: Los premios van ser los siguientes, pudiendo aportar nueves categoríes el xuráu na so deliberación:

12. 1 Categoríes escolares

  • Premiu al meyor videu de primaria
  • Premiu al meyor videu de secundaria y bachilleratu

El premiu nes categoríes escolares va consistir nun troféu, llote de productos culturales n’asturianu, diploma y la grabación d’un capítulu pilotu con medios profesionales nes instalaciones de Cuatro Gotes Producciones o nel centru educativu, pudiendo convertise dempués nun programa de la plataforma PlayPresta.

12. 2 Categoríes xenerales

  • Premiu al meyor videu de mocedá hasta 35 años
  • Premiu al meyor videu d’adultos

El premiu nes categoríes xenerales va consistir nun troféu, 150 euros, diploma y la grabación d’una temporada completa con medios profesionales nes instalaciones de Cuatro Gotes Producciones o nel centru educativu, que va emitise dientro de la programación de la plataforma PlayPresta.

Y d’ente toles categoríes, van otorgase les siguientes reconocencies, consistentes en diploma:

  • Premiu a la eficiencia comunicativa
  • Premiu a la calidá técnica
  • Premiu a la calidá llingüística
  • Premiu a la orixinalidá

13. Cada persona participante pue recibir más d’un premiu, y si’l xuráu asina lo considera, pue haber premios declaraos ermos o compartíos. Les cuantíes van ser úniques y van tar suxetes a les retenciones correspondientes conforme la llexislación tributaria.

14. La organización acútase’l drechu a emplegar los videos participantes na promoción del proyectu ¡Yes youtuber!, asina como na plataforma PlayPresta.

15. La participación nesti concursu significa aceptar dafechu les presentes bases y les decisiones del xuráu designáu.

Descarga equí la fueya d’autorización pa menores [pdf] [word]

 INSCRIPCIÓN